Gjërat që duhet të keni parasysh në mënyrë që t’i mbroni fëmijët tuaj nga dielli!

Lëkura është organi që preket dhe ndikohet më shumë nga rrezet e diellit dhe lëkura e fëmijëve është shumë më e ndjeshme se e të rriturve. Çdo djegie nga dielli që mund të pësojmë në moshën e fëmijërisë do të lërë gjurmë duke na predispozuar në të ardhmen për kancer të lëkurës. Hapi më i rëndësishëm në parandalimin e një situate të tillë mbetet padyshim mbrojtja nga dielli. Kjo fillon që me mosekspozimin në diell orët e rrezatimit më të fortë (10:00–16:00) për stinën e verës, te përdorimi i kapeleve me strehë të gjerë, syzeve të diellit dhe i domosdoshëm është përdorimi i kremrave mbrojtës nga dielli.

Duhet të bëhet zgjedhja e duhur në kremin që do përdoret, jo vetëm në drejtim të faktorit mbrojtës por dhe në drejtim të disa karakteristikave që duhet të ketë kremi mbrojtës te fëmijët. Më të përshtatshëm janë locionet se sa kremrat që paraqiten në formë sprajti, për arsye se ata krijojnë një barrierë fizike ndaj diellit, ndërsa sprajti krijon një barrierë kimike. Gjithmonë duhet të kemi parasysh që kremrat të jenë rezistentë ndaj ujit, kjo për arsye se fëmijët djersiten shumë më tepër gjatë kohës së lojërave dhe kalojnë shumë më tepër kohë në ujë.

Përdorni kremra mbrojtës nga dielli me bazë minerale të cilët janë të sigurt dhe të efektshëm dhe gjithashtu shumë të përshtatshëm për fëmijë me lëkurë të ndjeshme. Shikoni që në përbërjen e tyre të kenë oksid zinku ose dioksid titani si përbërësit veprues. Gjithashtu duhet të ketë një faktor mbrojtës nga dielli me spf 50+ ose më të lartë.

Përdorimi i kremit mbrojtës duhet të bëhet zakon për prindërit dhe për fëmijët, duhet të jetë një pjesë e rutinës së përditshme dhe duhet aplikuar në të gjitha zonat e ekspozuara të trupit. Të kihet në vëmendje që përdorimi i kremit të bëhet para ekspozimit në diell, për t’i dhënë kohë të thahet dhe të krijojë mbrojtjen e nevojshme, sepse nëse vonojmë dhe e aplikojmë në kohën që jemi në diell ai mund të mos jetë i efektshëm për arsye se fëmijët kanë filluar të djersiten ose të lahen në ujë pa.

Rikujtojmë, se nxirja e trupit, qoftë në sallon apo në diell, ndoshta nuk është një ide e mirë, pavarësisht nëse jeni shtatzënë apo jo. Ekspozimi ndaj rrezeve UV në mënyrë të përsëritur dhe për periudha të gjata kohore, përkeqëson efektet e plakjes. Gjithashtu mund të rrisë rrezikun e zhvillimit të kancerit të lëkurës. Ne nuk e dimë se si ekspozimi ndaj rrezeve të diellit apo rrezeve artificiale UV ndikon tek një fëmijë në zhvillim.