Përkthyesja Albana Nexhipi: “Shkrimtari shqiptar paragjykohet keq nga vet shqiptarët…”

Sot, e ftuar në emisionin “Live From Tirana”, nëpërmjet një lidhjeje telefonike ishte përkthyesja dhe pedagogia e njohur Albana Nexhipi, e cila këtë vit do të jetë pjesë e jurisë në panairin e librit që rikthehet sot, pas 1 viti mungesë për shkak të pandemisë. Si e gjen veten Albana në anagazhimin e saj për panairin?

Panairi i sivjetshëm, fillon sot në orën 11:00 dhe është një ngjarje për t’u shënuar dhe emocion shumë i madh. U mbajt vjet me shumë vështirësi online, me disa takime, por nuk është njësoj si ta prekësh librin me dorë dhe ta ndjesh emocionin që të jep libri. Sivjet panairi do të sjellë shumë emocion, një emocion ndryshe. Jo vetëm atmosfera me libra është e bukur që e thyen këtë agresivitetin e politikës që po dëgjojmë kohët e fundit, por unë dua që nga sot deri në datën 21 kur mbyllet panairi, dua që të flitet për librin. Do të doja shumë që kjo ngjarje kulturore të përqafohej nga të gjithë pavarësisht angazhimeve të tyre. Po t’i japim pak kohë leximit, do të na japë fryte shumë të mira.

Çfarë impresioni ka përkthyesja për këtë panair?

Nuk do të doja shumë të prononcohesha me emra dhe tekste kokrete, por ka libra shumë të mirë të shkruar shqip edhe nga autorë të rinj, jo vetem nga tradicionalë. Ka studime shumë të mira që konkurrojnë në mënyrë dinjitoze me ato që bëhen jashtë vendit si dhe ka dhe përkthime mjaft cilësore. Kam 20 vite që përkthej dhe kur lexoj një libër të përkthyer mirë është një lloj kënaqësie dhe habie. Kam lexuar disa përkthime që o Zot sa kanë punuar me fjalorin dhe sa pasuri ka ai fjalor. Ata që do të duan të jenë pjesë e këtij panairi dhe shpresoj të ketë shumë, do të kenë vërtet libra me vlerë. Nisesh me një paragjykim të caktuar dhe kur ti lexon kupton që shkrimtari shqiptar paragjykohet keq nga shqiptarët, po ata janë shumë të mirë dhe respektojnë të gjitha kriteret që duhen respektuar. Janë përkthyes me një leksik të pasur aq sa duket sikur shkrimtari e ka shkruar në shqip. E kam shijuar si eksperiencë dhe jam befasuar për mirë.

Sipas Albanës, përse duhet të lexojmë?

Jeta është shumë e shkurtër për t’i ruajtur të gjitha dimensionet që ofron. Përmes librit keni shumë mundësi të jeni president, kryeministër, të eksploroni në mendjen e njeriut, të njihni ato skuta që as nuk e dinit që ekzistonin. Duhet të lexojmë sepse njohim botë të tjera që nuk i njihnim, pasurohemi me gjëra që as nuk do të kemi mundësi t’i përjetojmë dhe shijojmë ndonjëherë. Me një libër ti mund të rrosh eksperiencën e një mbreti, dilemat e tij, mund të eksplorosh botën dhe më vjen keq që teknologja e ka vënë pak posht librin. IPad-i, celulari janë bërë krahu ynë i tretë por unë do të doja që të bëheshim me katër krahë dhe nga ana tjetër të mos lëshonim librin në asnjë mënyre.