Përveç ujitjes dhe heqjes së gjetheve të dëmtuara, ja çfarë duhet të bëni me bimët tuaja!

Kur mbajmë bimë në shtëpinë tonë, ato jo vetëm që na zbukurojnë ambientin, por edhe pastrojnë ajrin. Në mënyrë që të jenë të bukura dhe të shëndetshme, ato kanë nevojë për mirëmbajtje të rregullt. Përveç ujitjes dhe heqjes së gjetheve të dëmtuara, është i nevojshëm edhe pastrimi i rregullt i pluhurit të tyre.

Para se të zhduket drita e verës, sigurohuni që gjethet e bimëve të brendshme të mos i mbulojë pluhuri. Duke i pastruar gjethet, ju u mundësoni që të vazhdojnë të thithin dritën dhe të kryejnë funksione të tjera. Nëse gjethet e tyre janë të mbuluara me pluhur, bimët ndalojnë së prodhuari klorofil, gjethet zverdhen dhe rritja ngadalësohet.

Nëse keni një dorezë për pastrimin e pluhurit, lageni pak dhe nëse nuk keni, mund të përdorni edhe një leckë me mikrofibër. Më pas fshijeni butësisht çdo gjethe të bimës. Do të vini re se disa fletë mbledhin më shumë pluhur se të tjerat.

Gjithashtu, ndërsa jeni duke pastruar pluhurin, inspektoni bimët. Kontrolloni nëse mund të ketë ndonjë dëmtues që fshihet diku. Inspektoni gjethet e zbehta, të verdha, të thata, kafe ose të vyshkura. Kontrolloni nëse bimët po tregojnë shenja të nevojës për krasitje. Një nga shenjat e kësaj janë rrënjët mbi nivelin e dheut.